បទភ្លេងទំនុកច្រៀង ៖ គង្គ ប៊ុនឈឿន , សម្រួលតន្ត្រី ៖ ហាស់ សាឡន , ច្រៀងដោយ ៖ ស៊ិន ស៊ីសាមុត
ប្រវត្តិដើម ៖ លោក គង្គ ប៊ុនឈឿន និពន្ធបទនេះឡើង ដើម្បីឧទិ្ទសដល់ទឹកដីកំណើតរបស់ខ្មោចម្តាយលោក គឺឃុំព្រែកហ្លួង ។ ទោះបីលោកបានព្រាត់ឃ្លាតមកតាំងពីតូចមកក៏ដោយ ក៏ពេលណាដែលលោកបានទៅលេងទីនោះម្តងៗ លោកតែងឮគេនិយាយថា លោកមានបងប្អូនញាតិសន្តាន ហូរហែ ចាប់តាំងពីម្តុំវត្តកែវ ព្រែកខ្ពប រហូតទៅដល់ស្ទឹងចាស់ឯណោះ ។...
ដោយហេតុនេះហើយ ទើបនៅពេលដែលលោកជិះទូកដ ពីកំពង់ភូមិដូនទាវ ទៅកាន់ភូមិព្រែកហ្លូង លោកបានជួបនឹងនារីចែវទូកដម្នាក់ ដែលមានសម្រស់គួចជាប់ចិត្តក្នុងក្តីស្រមៃរបស់លោក ។
ធម្មជាតិជាកម្លោះ ឲ្យតែបានឃើញស្រីក្រមុំមានរូបស្អាត តែងតែមានគិតគួចរវើរវាយទៅរកផ្លូវស្នេហាជាធម្មតា ប៉ុន្តែនារីដែលចែវទូកដបញ្ជិះលោកនោះ មិនត្រឹមតែធ្វើឲ្យលោកលួចស្រឡាញ់ប៉ុណ្ណោះទេ គឺថែមទាំងធ្វើឲ្យលោកអាណិតអាសូរនាងខ្លាំងទៅទៀត ដោយសារនាងគរនិយាយមិនរួច ។ ក្រោយពីស៊ើបសួរគេឯងទៅ ទើបដឹងថានារីនោះមិនមែនជាអ្នកដ៏ទៃទេ គឺជាប់ជាសាច់សារលោហិតជាមួយលោកដែរ ប៉ុន្តែឆ្ងាយស្ទើរក្លាយជាអ្នកដ៏ទៃឯទៀតទៅហើយ ... ។
ទោះបីយ៉ាងនេះក្តី ក៏លោកនៅតែស្រមៃនឹកដល់ថ្ងៃចៃដន្យនោះ ហើយនឹកដល់ទេសភាព និងជីវិតដ៏សែនស្រងេះស្រងោច នៃភូមិឋានប្រជាជននៅតាមដងស្ទឹងរហូតដល់បណ្តាលឲ្យលោកប្រមូលចងក្រងមនោសញ្ចេតនា រៀបចំបទនេះឡើងគឺដើម្បីរំលឹកដល់ថ្ងៃមួយ ដែលខ្ញុំបានជិះទូកដទៅលេងស្រុក ជួបនឹងនារីកំសត់អត់ចេះនិយាយនោះឯង ។
គួរបញ្ជាក់ផងដែរថា អ្នកដែលធ្លាប់ទៅលេងភូមិដូនទាវ ក្នុងខេត្តបាត់ដំបង ទើបស្គាល់ទូកដនេះច្បាស់ គឺជាទូកតូច ចែវ១ ឬចែវ២ មានដំបូលសម្រាប់ដឹកអ្នកដំណើរចុះឡើងតាមដងស្ទឹង ហើយគិតជាតម្លៃឈ្នួលតាមជិតឆ្ងាយ ។
ប៉ុន្តែ មានផលិតកម្មវីដេអូខ្លះ មានការភ័ន្តច្រឡំ ពេលយកបទនេះទៅថតជាចម្រៀងកាយវិការ ឬការ៉ាអូខេ បែរជាដាក់ឲ្យតួសម្តែង ចែវឬអុំទូកឥតដំបូល ហើយឆ្លងពីម្ខាងទៅម្ខាងទៅវិញ ! នោះគេមិនមែនហៅថាទូកដទេ គឺគេហៅថាទូកចម្លង ។
ជាមួយនោះដែរ មានអ្នកនិពន្ធបទចម្រៀងខ្លះ ចង់និយាយពីជីវិតអ្នកចែវទូកដ គឺទូកឥតដំបូល ហើយឆ្លងទន្លេ ។ នេះជាភាពគ្មានប្រាកដនិយមឡើយ ការពិតទូកឥតដំបូល ដែលឆ្លងពីត្រើយម្ខាងទៅត្រើយម្ខាង មិនមែនហៅថាទូកដទេ គឺជាទូកចម្លង ។
-អ្នកដែលស្គាល់ភូមិសាស្ត្រទឹកដីនេះ គេអាចថាលោករៀបរាប់វិលវល់ចុះឡើង នូវឈ្មោះភូមិដែលលោកបានជិះទូកឆ្លងកាត់នោះ ។ ប៉ុន្តែ នេះគ្រាន់ជាការរៀបសម្រួលទៅតាមបច្ចេកទេសកំណាព្យតែប៉ុណ្ណោះ មិនមែនរៀបរាប់ហូរហែតាមលំដាប់លំដោយនោះទេ ។
១- ជិះទូកតាមស្ទឹង ប្រឹងលបមើលស្រី ធម្មជាតិស្រស់ខៀវខ្ចី ក្តាំងងារព្រែកស្តី ព្រៃវាលអន្លក់ ស្ទឹងចាស់ ព្រែកហ្លូង ទ្រូងជាប់ជ័រឆក់ ក្រោមភ្លៀវរលឹមតក់ៗ ជួបផ្កាខ្ចីល្ហក់ ឆើតឆាយ ។
២- បងជាទេសចរ ជិះទូកដរអូន គន់មើលផ្កាស្រពោន ដៃតូចស្រឡូនគាស់ទឹកបែកខ្ចាយ កុលាប វត្តកែវ ល្អគន់មិនណាយ ភ័ក្រ្តស្រស់សក់វែងរំសាយ បងតែងចុតហ្មាយសុំស្នេហ៍ ។
R- តែកម្មអាក្រក់ ដក់ត្រាំដួងចិត្ត ដូចមេឃងងឹត ព្រាត់ពីដួងខែ កុលាបឆើតស្រស់ មានសម្ផស្សស្នេហ៍ ផលកម្មបំបែរ ឲ្យគនិយាយមិនរួច ។
៣- បងអារឈាមស្រោច ក្នុងស្ទឹងសង្កែ ក្រោមពន្លឺដួងខែ ផ្សងឲ្យជួបស្នេហ៍កុលាបថ្ពាល់ខួច កុលាប វត្តកែវនេត្រាមុតស្រួច សូមឲ្យបាននិយាយរួច ឲ្យដឹងថាបងលួចស្នេហ៍ ៕
ដកស្រង់ពី
សៀវភៅកំណាព្យស្នេហ៍មាស
ដោយលោក គង្គ ប៊ុនឈឿន
0 comments:
Post a Comment