ថ្ងៃនេះសុំលើករឿងច្រលំលេខទូរស័ព្ទម្តង ដែលរឿងនេះខ្ញុំជឿថាអ្នកគ្រប់គ្នាប្រាកដជាធ្លាប់ជួបប្រទះមិនថាតេចេញ រឺទទួលចូលឡើយ ។ ចំពោះខ្ញុំវិញក៏មានរឿងដូចនេះដែរ ប៉ុន្តែចំឡែកអីអ្នកដែលច្រឡំលេខមកខ្ញុំម្តងៗមិនដែលមានសម្តីពិរោះពិសារម្តងណាឡើយ មានតែអ្នកសម្តីទ្រគោះបោះបោកមិនចេះស្តាប់គ្នាសោះ ។ ខ្ញុំសូមលើកយករឿងខ្លះៗរបស់ខ្ញុំមកជម្រាបដូចខាងក្រោម ៖
រឿងទីមួយ : ជាធម្មតានៅពេលយប់ខ្ញុំតែងតែបិទទូរស័ព្ទ ដើម្បីថែរក្សាថ្មឲបានយូរ និងម៉្យាងទៀតមិនចង់និយាយទូរស័ព្ទពេលយប់ផង គឺងងុយគេងខ្លាំងណាស់ ហើយរៀងរាល់ព្រឹកម៉ោង ៦ ខ្ញុំបើកវិញព្រោះដាក់ទូរស័ព្ទឲដាស់ម៉ោងហ្នឹងដើម្បីរៀបចំខ្លួនទៅធ្វើការ ។ ថ្ងៃមួយខ្ញុំបើកទូរស័ព្ទភ្លាមក៏ទទួលបានទូរស័ព្ទចូលមួយភ្លែត ហើយក៏លើកនិយាយឡើង
"អាឡូ ! ជំរាបសួរ"
សម្លេងខ្សែរម្ខាងទៀតគឺជាស្រីដែលបានឆ្លើយឆ្លងដូចតទៅ
"ហ្នឹងម្ចាស់ទូរស័័ព្ទនេះមែនទេ?"
"ចា៎គឺខ្ញុំ"
"ទូរស័ព្ទនេះបិទមួយយប់ហើយ"
"ទូរស័ព្ទខ្ញុំតែងតែបិទចឹងរាល់យប់ហ្នឹង ចុះបងស្រីមានការអីដែរ?"
"យ៉ាងម៉េចចង់គេចអី ! រាល់ថ្ងៃនេះខ្វះប្តីណាស់មែនទេ"
"អូ ! និយាយដូចជាមិនត្រូវសាច់រឿងគ្នាសោះប្រហែលជាច្រឡំលេខហើយ"
"កុំព្យាយាមនិយាយបង្វែរអី ស្រីដូចជានាងឯងយើងដឹងឬកអស់ហើយ អាក្រក់ថោកទាប ..."
"កាន់តែវែងឆ្ងាយហើយ ខ្ញុំប្រាប់ហើយថាច្រឡំលេខ"
"មិនច្រឡំទេយើងឆែកច្បាស់ណាស់ ហើយចុចតេទៅមួយយប់ឯណោះតែមិនចូល"
"ខ្ញុំអត់មានពេលឈ្លោះរឿងដែលនិយាយគ្នាស្តាប់មិនបានចឹងទេ ខ្ញុំរវល់ណាស់មិនមានពេលឈ្លោះទេ ឆែកលេខសារឡើងវិញទៅ"
"បាន ! យើងនឹងឆែកឡើងវិញកុំគេចទៅណាឲសោះយើងនឹងតេមកម្តងទៀត"
មិនទាន់បានឆ្លើយតបផងក៏បិទទូរស័ព្ទបាត់ ហើយក៏មិនឃើញទូរស័ព្ទមកទៀតសោះរហូតដល់ពេលនេះ។
រឿងទីពីរ:
"អាឡូ ! ជំរាបសួរ"
ខ្សែម្ខាងទៀតជាសម្លេងក្មេងប្រុសជំទង់ បើតាមខ្ញុំស្មានអាយុខ្តង់ ១៤ ទៅ ១៥ឆ្នាំប៉ុណ្ណោះ
"ម៉េចក៏ហ៊ានកាន់ទូរស័ព្ទរបស់ប៉ាយើង ! ថ្ងៃក្រោយកុំចេះប៉ះទូរស័ព្ទនេះឲសោះ"
"ទូរស័ព្ទរបស់ប៉ា ? អូ ! ច្រឡំទៀតហើយ ទូរស័ព្ទនេះខ្ញុំប្រើជិត១០ឆ្នាំហើយ ទៅទិញពីក្រុមហ៊ុនទាំងទូរស័ព្ទ ទាំងលេខមិនបានប្រើរបស់អ្នកណាទេ ឆែកលេខម្តងទៀតទៅ !"
"មិនច្រឡំទេ ! លេខរបស់ប៉ាយើងរឿងអីមិនស្គាល់"
"ចឹងលេខប៉ាប្អូនប៉ុន្មានដែរ?"
"០-- --- ---"
"ព្រះជាម្ចាស់ ! ចឹងបានទៅជាចឹង លេខ៦ខ្ទង់ចុងក្រោយដូចគ្នាទាំងអស់ គ្រាន់តែប្រព័ន្ធខុសគ្នាតែប៉ុណ្ណោះ ០១១ និង ០១២"
លឺដូចនេះខ្សែរម្ខាងទៀតក៏ចុចបិទបាត់ មិនបានលាមួយមាត់សោះ :)
រឿងទីបី :
ប្រហែលជាម៉ោង២ រឺ ២ជាងបន្តិច
"អាឡូ ! ជំរាបសួរ"
"អាឡូ ! កាលណាមកដល់ តុលាការគេមកដល់ជុំគ្នាអស់ហើយបាត់តែចែឯងប៉ុណ្ណោះ"
"សុំទោសពូ ខ្ញុំអត់មានរឿងអីត្រូវឡើងតុលាការផង ពូច្រឡំលេខហើយ"
"ច្រឡំយ៉ាងម៉េច ម្សិលមិញឲលេខនេះច្បាស់ណាស់"
"ពូពិនិត្យមើលឡើងវិញទៅ"
"ចឹងបានហើយ ! ទឺត ទឺត ទឺត ..."
ចុចបិទបាត់ម្នាក់ទៀតហើយ
រឿងបែបនេះខ្ញុំនៅមានជាច្រើនទៀតអង្គុយរៀបរាប់មិនអស់ទេ ដូច្នេះសំណូមពរឲរាល់អ្នកប្រើទូរស័ព្ទទាំងអស់ មុននឹងតេទៅនណាម្នាក់ត្រូវពិនិត្យមើលលេខឲបានច្បាស់សិន ជៀសវាងមានការច្រឡំ តែបើច្រឡំហើយនោះក៏និយាយជាមួយគេឲបានសមរម្យកុំដូចបីនាក់ខាងលើគឺយ៉ាប់តែម្តងហើយ :)
0 comments:
Post a Comment