កាលពីថ្ងៃ អាទិត្យ ទី ១៣ ខែ ធ្នូ ឆ្នាំ ២០០៩ ដែលជាថ្ងៃសំរាកពីការងារខ្ញុំ និងបងស្រីបានទៅផ្សារដើម្បីទិញសម្ភារៈ និងគ្រឿងបរិភោគមួយចំនួន លុះចេញមកវិញក៏បាត់សំបុត្រផ្ញើរម៉ូតូរកមិនឃើញសោះមិនដឹងវាជ្រុះនៅពេលណាកន្លែងណាទេ ទោះខំរកច្រើនលើកច្រើនសារក៏នៅតែមិនឃើញ អស់លទ្ធភាពហើយខ្ញុំ និងបងស្រីក៏ទៅជួបសួរនាំអ្នកដែលទទួលផ្ញើរម៉ូតូនោះថា ៖
-សំបុត្រផ្ញើរម៉ូតូរបស់ខ្ញុំបាត់ហើយ តើត្រូវមានលក្ខខណ្ឌណាខ្លះ ដើម្បីយកម៉ូតូចេញបាន?
អ្នកនោះប្រាប់វិញថា ៖
-ទាល់តែម៉ោង ៦ ល្ចាចហួសម៉ោងទទួលខុសត្រូវទើបអាចយកចេញបាន
ដូច្នេះខ្ញុំ និងបងស្រីក៏សម្រេចចាំដល់ម៉ោង៦ល្ចាច ក្នុងអំឡុងពេលដែលចាំខ្ញុំត្រូវអ្នកដែលទទួលផ្ញើរម៉ូតូនោះប្រើពាក្យសម្តីគំរោះគំរើយដាក់ជាច្រើនលើកច្រើនសារដោយនិយាយថា ៖
-ទៅចាំឲឆ្ងាយពីកន្លែងនេះទៅ ! ទើសទែងកន្លែងគេរកស៊ីខ្លាំងណាស់
ប៉ុន្ងែបើគិតថាទើសទែងនោះដូចជាមិនមែនទេ ព្រោះខ្ញុំ និងបងបានឈរនៅអែបម្ខាងកៀនជញ្ជាំងដោយមិនមានប៉ះពៀរ រឺរំខានដល់កន្លែងរបស់គេឡើយ ។ ម៉ោង ៦ល្ចាចមកដល់ខ្ញុំសួរថា ៖
-តើខ្ញុំអាចយកម៉ូតូចេញបានហើយ រឺនៅ?
គេថា ៖
-មិនទាន់បានទេទាល់តែមានកាតគ្រីសិន (ប័ណ្ណសម្គាល់ម៉ូតូ)
សូមបញ្ជាក់ថា ៖ រាល់ពាក្យសម្តីរបស់គេនិយាយចេញមកគឺគំរោះគំរើយបំផុត ដោយពេលខ្លះខ្ញុំសួរគេ គេមិនទាំងនិយាយរកផង គឺអង្គុយធ្វើមិនលឺ តែបើគេឆ្លើយត្រឡប់មកវិញនោះស្រែកដាក់ខ្ញុំលឺអស់អ្នកនៅជុំវិញហ្នឹងទាំងអស់ គេធ្វើដាក់ពួកខ្ញុំហាក់បីដូចជាខ្ញុំនេះទៅសុំទានគេអីចឹង ។
ពេលនោះខ្ញុំក៏ជិះម៉ូតូឌុបទៅផ្ទះដើម្បីយកកាតគ្រី និងឯកសារមួយចំនួនដែលពាក់ព័ន្ធហ្នឹងម៉ូតូនេះ ពេលយកមកដល់ហើយក៏ឲទៅគេដើម្បីពិនិត្យមើលលេខម៉ាស៊ីន ម៉ាក់ ស៊េរី ឈ្មោះ ។ល។ តែគេមិនមើលនោះទេ គេថា ៖
-រវល់ណាស់គ្មានពេលមើលទេ ទុកទាំងកាត់គ្រី និងម៉ូតូនៅទីនេះហើយ ស្អែកទើបយកចេញបាន បើនៅផ្សារសូរិយាវិញត្រូវពិន័យ ២ម៉ឺនរៀលឯណោះ !
ខ្ញុំឆ្លើយទៅវិញ ៖
-ម៉េចនិយាយអីចឹងទៅវិញក្រែងប្រាប់ខ្ញុំថាម៉ោង ៦ល្ចាចអាចយកបានតែម៉េចក៏មិនឲខ្ញុំយកព្រមទាំងសួរនាំរកកាតគ្រី និងឯកសារមួយចំនួនដល់ពេលខ្ញុំយកមកឲហើយ ថាគ្មានពេលមើលហើយចង់យកទាំងកាតគ្រី និងម៉ូតូរបស់ខ្ញុំទុកនៅទីនេះទៀត
និយាយហើយខ្ញុំក៏យកកាតគ្រី និងឯកសារទាំងអស់នោះមកវិញស្រាប់តែពេលនោះគេព្រមទាំងក្រុមគ្រួសារមាន ៖ ឳពុក ម្តាយ កូនប្រុស កូនស្រី នាំគ្នាចេញមកព្រមទាំងស្រែកគំហ៊កឲខ្ញុំខ្លាំងៗ
-កុំមករញ៉េរញ៉ែនៅផ្ទះនេះ គេត្រូវការរកស៊ី
-ខ្ញុំមិនបានរញ៉េរញ៉ៃទេ គ្រាន់តែសួរនាំដើម្បីយកម៉ូតូប៉ុណ្ណោះ ព្រោះម៉ូតូខ្ញុំនៅទីនេះ បើមិនឲម៉ូតូខ្ញុំពេលនេះស្អែកខ្ញុំមកយកក៏បានដែរ តែខ្ញុំសូមលិខិតបញ្ជាក់ថាបានតំកល់ម៉ូតូ លេខម៉ាស៊ីន ម៉ាក់ ស៊េរី ... នៅទីនេះត្រូវបានទុកដោយសារបាត់ប័ណ្ណផ្ញើរម៉ូតូ
និយាយបានតែប៉ុណ្ណេះគ្រួសារនោះខឹងយ៉ាងខ្លាំង ហើយនាំគ្នាស្រែកឲខ្ញុំខ្លាំងៗយ៉ាងញាប់មាត់ដោយមិនឲខ្ញុំ និងបងនិយាយតបវិញសូម្បីតែមួយម៉ាត់
-ឆាប់ចេញពីទីនេះកុំមករញ៉េរញ៉ែផ្ទះយើង យើងគ្មានត្រូវការចេញលិខិតស្នាមអីទាំងអស់យើងមិនបានទុកម៉ូតូរបស់អ្នកឯងទេ បើគ្រាន់បើទៅយកប័ណ្ណផ្ញើរម៉ូតូនោះមក ហើយកាតគ្រីម៉ូតូនេះក៏វាគ្មានតម្លែអីដែរ អ្នកឯងមិនមែនជាម្ចាស់ម៉ូតូនេះទេទោះកាត់គ្រីមុខហ្នឹងឈ្មោះហ្នឹងក៏មិនខ្វល់ដែរ ឲតែអ្នកណាមានប័ណ្ណមកបើកយកគឺត្រូវតែឲទាំងអស់ ម៉ូតូតម្លៃថោកបែបនេះមិនចង់បានទេបើមិនជឿមើលតែផ្ទះយើងទៅគឺពីរល្វែងឯណោះ ...
ស្មេះត្រឹមនេះចុះ ព្រោះវានៅមានច្រើនទៀតដែលគ្រួសារនេះនិយាយត្មិះតែសដៀលខ្ញុំ និងបងស្រីគ្រាន់តែរឿងម៉ូតូសោះ ។
ខ្ញុំជាមនុស្សចេះស្តាប់ហេតុផល យកហេតុផលមកនិយាយជាមួយខ្ញុំគឺខ្ញុំរីករាយបំផុត និងអាចទទួលយកបាន ហេតុអីចាំបាច់ត្រូវប្រើពាក្យអសុរោះ គ្មានសីលធម៌ គ្មានយល់ច្បាប់ទំលាប់និយាយឲតែបានលឹសម្លេងតែគ្មានន័យខ្លឹមសារដូចបំពង់ឫស្សីដែលត្រូវខ្យល់បក់អីចឹង ។ ម៉្យាងទៀតខ្ញុំដូចជាមិនអស់ចិត្តសោះដោយគ្រួសារមួយនេះមិនទុកកាតគ្រីដែលចេញដោយរដ្ឋជាការសំខាន់ សូម្បីតែក្នុងកាតគ្រីមានទាំងរូបថតរបស់ខ្ញុំច្បាស់ដូចថ្ងៃ នៅតែគ្មានប្រយោជន៍ ។ ខ្ញុំយល់ ! ថាការដែលទទួលផ្ញើរម៉ូតូនោះត្រូវប្រុងប្រយ័ត្នជៀសវាងមានជនខិលខូចលួចបន្លំ ដូច្នេះហើយបានជាខ្ញុំខំប្រមែប្រមូលឯកសារយកមកបញ្ជាក់ឲបានជាមុនជៀសវាងមានជនឆ្លៀតឱកាស ប៉ុន្តែហេតុអីបានជាគ្រួសារនោះនៅតែជចេសរង់ចាំអ្នកដែលកាន់ប័ណ្ណតូចនោះមកគេនឹងឲម៉ូតទៅភ្លាម ធ្វើបែបនេះតើមានន័យថាឃុបឃិតជាមួយចោរត្រូវ រឺក៏អត់?
ដូច្នេះខ្ញុំសូមផ្តាំផ្ញើរទៅអ្នកទាំងអស់គ្នា ទាំងប័ណ្ណផ្ញើរម៉ូតូ ឡាន រឺសម្ភារៈផ្សេងៗទៀតត្រូវប្រយ័ត្នកុំឲបាត់បង់ កុំធ្វេសប្រហែសដូចជាខ្ញុំឲសោះបើជួបមនុស្សដែលមានហេតុផលត្រឹមត្រូវនោះគឺស្រួលពិភាក្សា និងដោះស្រាយទេ តែបើដូចខ្ញុំវិញនោះប្រាកដជាស៊យហើយ :) ខ្ញុំរៀបរាប់ខាងលើនេះមិនមែនក្នុងន័យរករឿងអ្នកនោះអីទេគ្រាន់តែផ្តាំផ្ញើរអ្នកផ្សេងទៀតទុកជាបទពិសោធន៍ទៅថ្ងែក្រោយប៉ុណ្ណោះ ៕
0 comments:
Post a Comment